نہ تو زميں کے لئے ہے نہ آسماں کے لئے
جہاں ہے تيرے لئے ، تو نہيں جہاں کے لئے

يہ عقل و دل ہيں شرر شعلہ محبت کے
وہ خار و خس کے لئے ہے يہ نيستاں کے لئے

مقام پرورش آہ و نالہ ہے يہ چمن
نہ سير گل کے لئے ہے نہ آشياں کے لئے

رہے گا راوي و نيل و فرات ميں کب تک
ترا سفينہ کہ ہے بحر بے کراں کے لئے

نشان راہ دکھاتے تھے جو ستاروں کو
ترس گئے ہيں کسي مرد راہ داں کے لئے

نگہ بلند، سخن دل نواز، جاں پر سوز
يہي ہے رخت سفر مير کارواں کے لئے

ذرا سي بات تھي ، انديشہ عجم نے اسے
بڑھا ديا ہے فقط زيب داستاں کے لئے

مرے گلو ميں ہے اک نغمہ جبرئيل آشوب
سنبھال کر جسے رکھا ہے لا مکاں کے لئے